Валюталар курсу:
USD 84,79
EUR 103,2
KZT 0,201
RUB 1,132
(0312) 66-49-60, (0312) 62-53-79 office@gf.kg
  • Кыргызча
  • Русский
  • English
  • Select Page
    Президент Сооронбай Жээнбеков Россия-Кыргыз өнүктүрүү Фондунун, «Кепилдик фонд» ААК, «Айыл Банк» ААК жана «РСК Банк» ААК төрагаларын кабыл алды

    Президент Сооронбай Жээнбеков Россия-Кыргыз өнүктүрүү Фондунун, «Кепилдик фонд» ААК, «Айыл Банк» ААК жана «РСК Банк» ААК төрагаларын кабыл алды

    Кыргыз Республикасынын Президенти Сооронбай Жээнбеков бүгүн, 6-мартта Россия-Кыргыз өнүктүрүү Фондунун (РКӨФ) төрагасы Эркин Асрандиевди, «Кепилдик фонд» ААК төрагасы Малик Абакировду, «Айыл Банк» ААК төрагасы Мурат Акимовду жана «РСК Банк» ААК төрагасы Азизбек Оморкуловду кабыл алды.

    Мамлекет башчысы 2019-жылдын 27-28-февралында бийликтин бардык бутактарынын жетекчилери, жергиликтүү бийликтин башчылары, бизнес, жарандык коом жана өнөктөш уюмдардын өкүлдөрү катышкан «Региондорду өнүктүрүү боюнча улуттук диалогу» болуп өтүп, жер-жерлердеги көйгөйлөр талкууланып, катышуучулар тарабынан региондордо финансылык каражаттардын жеткиликтүүлүгү боюнча суроолор көтөрүлгөндүгүн эске салды.

    Президент региондордогу бизнести, экспортко багытталган ишканаларды колдоону улантыш керектигин баса белгиледи.

    «Ишкерлердин жаңы долбоорлоруна колдоо көрсөтүү, каржылоо, ошол эле маалда аларга туура бизнес алып барууну үйрөтүш керек. Бул жерде финансы-кредиттик мекемелер алдыңкы ролду ойнойт», — деп белгиледи Сооронбай Жээнбеков.

    Ошондой эле учурда логистикалык борборлор бардык облустарда ачылбаганын белгилеп, логистикалык борборлорду куруу долбоорлоруна көӊүл бурууну сунуштады. Жакында өндүрүштү жандандыруу боюнча программа иштелип чыгарын, буга байланыштуу өндүрүш ишканаларын каржылоо боюнча сунуштар берилиши зарылдыгын белгиледи.

    Президент Сооронбай Жээнбеков кредиттерди берүүдө соодага эмес, Улуттук стратегияда белгиленген өнөр жай, кайра иштетүү, энергетика, туризм, айыл-чарба сыяктуу приоритеттүү тармактарга, кепилдик берүүдө региондорго көбүрөөк көӊүл буруу зарылдыгын белгиледи.

    Мындан тышкары, «Региондорду өнүктүрүү жана өлкөнү санариптештирүү» жылынын алкагында кредит алуу маселеси жер-жерлерге санарип технологиялар аркылуу жеткиликтүү, арзан жана кыска убакытта бюрократиясы жок берилүүсү камсыздалышы керектигин баса белгиледи.

    Аталган финансы институттарынын жетекчилери 2018-жылдын жыйынтыгы, аймактардагы ишкерликти колдоо, жалпысынан мамлекеттеги бизнести өнүктүрүү боюнча аткарылган жумуштар жана аймактардагы долбоорлорду ишке ашыруу боюнча алдыга коюлган пландар тууралуу маалымат беришти.

    http://prezident.kg

    Өлкөнүн финансы институттары аймактык ишкерлерге берилген кредиттердин көлөмүн жана суммасын көбөйттү

    Өлкөнүн финансы институттары аймактык ишкерлерге берилген кредиттердин көлөмүн жана суммасын көбөйттү

    Өлкөнүн финансы институттары — Россия-Кыргыз өнүктүрүү Фонду (РКӨФ), «Кепилдик фонд» ААК, «Айыл Банк» ААК жана «РСК Банк» ААК аймактык ишкерлерге берилген кредиттердин көлөмүн жана суммасын көбөйттү. Бул тууралуу жогоруда аты аталган финансылык институттардын жетекчилери бүгүн, 6-мартта Кыргыз Республикасынын Президенти Сооронбай Жээнбековдун кабыл алуусунда маалымдашты.

    РКӨФ төрагасы Эркин Асрандиевдин маалыматына ылайык, 2018-жылдын аягына карата РКӨФ тарабынан жалпы суммасы 304 млн АКШ долларды түзгөн 1 653 долбоор жактырылган. 2018-жылдын ичинде жактырылган кредиттердин суммасы 42,1 млн АКШ долларын түзүп, саны 2 эсеге өсүп, 1653 долбоорду түзгөн (+831 кредит). Жыл ичинде курулуш материалдарын чыгарган ишкана, цемент заводу, кийим жана бут кийим тигүүчү фабрикалар, макарон комбинаты — бардыгы болуп 7 ири ишкана ачылды. Бул көрсөткүчтөр Фонддун өнөктөш банктары тарабынан берилген кредиттердин аркасы менен келип чыккан.

    «Кепилдик фонду» ААКтын төрагасы Малик Абакиров маалымдагандай, 2018-жылдын аягына карата Кепилдик фонддун портфели 755 млн сомго 656 гарантия түзгөн. Берилген кепилдиктердин эсебинен коммерциялык банктар тарабынан 2,7 млрд сомго кредиттер берилген. 2018-жылы 507 млн сом өлчөмүндө 419 гарантия берилген. 2017-жылга салыштырмалуу саны боюнча 76%га, ал эми суммасы боюнча 2 эсеге өскөн. 2019-жылга карата 1 млрд сомго чейин кепилдик берүү пландалууда.

    «Айыл Банктын» төрагасы Мурат Акимовдун айтымында, 2017-жылга салыштырмалуу жыл ичинде Айыл Банктын кредиттик портфели 14,7 млрд сомдон 19,3 млрд сомго чейин (+4,6 млрд сом) өскөн. 2018-жылы 13,20 млрд сом өлчөмүндө 50 940 кредит берилип, 2017-жылга салыштырмалуу 2,5 млрд сомго көбүрөөк жана саны 4 968ге өскөн. Аймактарга 8,39 млрд сом өлчөмүндө кредиттер берилип, суммасы 2017-жылга салыштырмалуу 1,96 млрд сомго өскөн, 4 325ке көбөйгөн. «Айыл Банк» өзгөчө сүттү кайра иштетүү жагына көңүл бурууда.

    Өз кезегинде «РСК Банктын» төрагасы Азизбек Оморкулов белгилегендей, 2017-жылга караганда 2018-жыл ичинде РСК Банктын кредиттик портфели 10,7 млрд сомдон 12,6 млрд сомго чейин (+17,9%) өскөн, 8,04 млрд сом өлчөмүндө 8 899 кредит берилген жана облустарга берген кредиттердин көлөмү жогорулаган. Региондорго берилген (Чүй облусунан башка) кредиттердин суммасы 3,25 млрд сомго, 2017-жылга караганда 11,25% өскөн, жалпысынан 6 302 кредит берилген. Ошондой эле «РСК Банк» мобилдик банкинг кызматын киргизди, эми эл көпчүлүк төлөмдөрдү интернет аркылуу жүргүзсө болот.